ന്യൂസിലന്‍ഡിന് പിന്നാലെ ഇംഗ്ലണ്ടും പാകിസ്ഥാന് പര്യടനത്തില്‍ നിന്ന് പിന്‍മാറി. ഒക്ടോബറില്‍ നടക്കേണ്ട പരമ്പരയില്‍ നിന്ന് സുരക്ഷാ കാരണങ്ങളാലാണ് ഇംഗ്ലണ്ടിന്റെ പിന്‍മാറ്റം. താരങ്ങളുടേയും സപ്പോര്‍ട്ട് സ്റ്റാഫിന്റെയും സുരക്ഷയ്ക്കാണ് പ്രഥമ പരിഗണന നല്‍കുന്നതെന്ന് ഇംഗ്ലണ്ട് ആന്‍ഡ് വെയ്ല്‍സ് ക്രിക്കറ്റ് ബോര്‍ഡ് പ്രസ്താവനയിലൂടെ വ്യക്തമാക്കി.
ഒക്ടോബറില്‍ രണ്ട് ടി-ട്വന്റി മത്സരങ്ങള്‍ക്കായി ഇംഗ്ലണ്ട് പാകിസ്ഥാനിലെത്തുമെന്നാണ് അറിയിച്ചിരുന്നത്. പാകിസ്ഥാനില്‍ എത്തി മത്സരം തുടങ്ങുന്നതിന് തൊട്ടു മുന്‍പാണ് ന്യൂസിലന്‍ഡ് ടീം കഴിഞ്ഞയാഴ്ച നാട്ടിലേക്ക് മടങ്ങിയത്.
2009ല്‍ ശ്രീലങ്കന്‍ ക്രിക്കറ്റ് ടീമിന്റെ ബസിന് നേരെ ഉണ്ടായ ആക്രമണത്തെ തുടര്‍ന്ന് പാകിസ്ഥാന് പര്യടനം നടത്താന്‍ പ്രധാന ടീമുകള്‍ വിസമ്മതിച്ചിരുന്നു. എന്നാല്‍ ഈ വര്‍ഷമാദ്യം ദക്ഷിണാഫ്രിക്ക പാകിസ്ഥാനില്‍ കളിച്ചിരുന്നു. പക്ഷെ പാക്കിസ്ഥാനിലെത്തിയ ന്യൂസിലാൻഡ് ടീം മത്സരത്തിന് തൊട്ടു മുൻപ് സുരക്ഷാ കാരണങ്ങളാൽ പരമ്പരയിൽ നിന്നും പിന്മാറുകയും, പിന്നീട് ചാർട്ടേർഡ് ഫ്ലൈറ്റിൽ പാകിസ്ഥാനിൽ നിന്നും സ്ഥലം വിടുകയും ചെയ്ത നാണക്കേടിൽ നിൽക്കവെ ഇംഗ്ലണ്ടും മത്സരങ്ങളിൽ നിന്നും പിന്മാറിയത് പാകിസ്ഥാന് തിരിച്ചടിയായി.
✍️ എസ്.കെ.
Leave a reply