യുവേഫ ചാമ്പ്യന്‍സ് ലീഗ് ക്വാര്‍ട്ടര്‍ മല്‍സരങ്ങല്‍ക്കുള്ള നറുക്കെടുപ്പ് ഇന്ന് സ്വിറ്റ്സര്‍ലാന്‍റിലെ നിയോണില്‍ കഴിഞ്ഞു. നറുക്കെടുപ്പ് കഴിഞ്ഞപ്പോള്‍ നിലവിലെ ജേതാക്കളായ ബയേണ്‍ മ്യൂണിക്കിന് റണ്ണറപ്പായ പി.എസ്.ജിയാണ് എതിരാളി. ബയേണിനെതിരെ പ്രതികാരം ചെയ്യാന്‍ പിഎസ്ജിക്ക് കിട്ടിയ മികച്ച അവസരമാണിത്.
2018ലെ ചാമ്പ്യൻസ് ലീഗ് ഫൈനലിസ്റ്റുകളായ റയല്‍ മാഡ്രിഡും ലിവര്‍പൂളും ഇത്തവണ ക്വാര്‍ട്ടറില്‍ ഏറ്റുമുട്ടും. പ്രീമിയര്‍ ലീഗില്‍ മുന്നേറുന്ന സിറ്റിക്ക് ജര്‍മന്‍ ക്ലബ്ബ് ബൊറൂസ്സിയ ഡോര്‍ട്മുണ്‍ഡാണ് എതിരാളികള്‍. ചെല്‍സി എഫ്.സി പോര്‍ട്ടോയെ നേരിടും.
ബയേണ്‍ – പി.എസ്.ജി മത്സര വിജയികള്‍ സെമിയില്‍ സിറ്റി – ഡോര്‍ട്മുണ്‍ഡ് മത്സര വിജയികളെ നേരിടും. ചെല്‍സി – പോര്‍ട്ടോ മത്സരത്തിലെ വിജയികള്‍ക്ക് റയല്‍ മാഡ്രിഡ് – ലിവര്‍പൂള്‍ മത്സരത്തിലെ വിജയികളാകും എതിരാളികള്‍.
ക്വാര്‍ട്ടര്‍ ഫൈനല്‍ ആദ്യ പാദ മത്സരങ്ങള്‍ ഏപ്രില്‍ ആറിനോ ഏഴിനോ നടക്കുമ്പോൾ രണ്ടാം പാദം ഏപ്രില്‍ 13 അല്ലങ്കില്‍ 14 തീയതികളിലാകും നടക്കുക. മേയ് 29-ന് ഇസ്താംബൂളിൽ വച്ചാണ് ഫൈനല്‍.
Leave a reply