ഇറ്റാലിയന്‍ ക്ലബ്ബായ യുവന്റസ് വിടാന്‍ പോര്‍ച്ചുഗല്‍ നായകന്‍ ക്രിസ്റ്റിയാനോ റൊണാള്‍ഡോ തീരുമാനിച്ചെന്ന് യുവന്റസ് കോച്ച് അലെഗ്രി വ്യക്തമാക്കി മണിക്കൂറുകൾക്കകം നടന്നത് വമ്പൻ ട്വിസ്റ്റുകൾ. ഇംഗ്ലീഷ് പ്രീമിയര്‍ ലീഗ് ക്ലബ്ബായ മാഞ്ചസ്റ്റര്‍ സിറ്റിയിലേക്ക് റൊണാൾഡോ എത്തുമെന്ന് വാർത്തകൾ സജീവമായിരുന്നെങ്കിലും, റൊണാള്‍ഡോ സിറ്റിയിലേക്ക് വരുന്നകാര്യം സിറ്റി പരിശീലകന്‍ പെപ് ഗ്വാര്‍ഡിയോള സ്ഥിരീകരിക്കാതിരിക്കുകയും ചെയ്തതോടെ റൊണാള്‍ഡോ തന്റെ പഴയ തട്ടകമായ മാഞ്ചസ്റ്റര്‍ യുണൈറ്റഡിലേക്ക് തന്നെ തിരികെയെത്തുമെന്നാണ് സൂചന. റൊണാള്‍ഡോ ടീമെലെത്തുന്ന കാര്യം സംശയമാണെന്നായിരുന്നു ആഴ്‌സണലിനെതിരായ മത്സരത്തിന് മുന്നോടിയായി നടത്തിയ വാര്‍ത്താസമ്മേളനത്തില്‍ ഗ്വാര്‍ഡിയോളയുടെ പ്രതികരണം.
റൊണാള്‍ഡോ നിലവില്‍ യുവന്റസ് താരമാണെന്നും അതില്‍ക്കൂടുതല്‍ ഒന്നും പറയാനില്ലെന്നും പറഞ്ഞ ഗ്വാര്‍ഡിയോള ട്രാന്‍സ്ഫര്‍ വിൻഡോ അവസാനിക്കാൻ മൂന്നോ നാലോ ദിവസം ബാക്കിയുണ്ടെന്നതിനാല്‍ എന്തും സംഭവിക്കാമെന്നും വ്യക്തമാക്കി. അതേസമയം റൊണാള്‍ഡോ ടീമിലെത്താനുള്ള സാധ്യത യുണൈറ്റഡ് പരിശീലകന്‍ ഒലെ തള്ളിക്കളഞ്ഞതുമില്ല. യുവന്റസ് വിടുകയാണെങ്കില്‍ റൊണാള്‍ഡോയെ ഇരുകൈയും നീട്ടി സ്വീകരിക്കാന്‍ യുണൈറ്റഡ് തയ്യാറാണെന്ന് ഒലെ പറഞ്ഞു. റൊണാള്‍ഡോ യുനൈറ്റഡിന്റെ ഇതിഹാസ താരമാണെന്നും ഒലെ വ്യക്തമാക്കി.
തുടർന്ന് മാഞ്ചസ്റ്റര്‍ യൂണൈറ്റഡിലേക്കാണ് റൊണാള്‍ഡോ എത്തുക എന്നാണ് ഏറ്റവും പുതിയ റിപ്പോർട്ടുകൾ. റൊണാള്‍ഡോയുടെ ഏജന്റ് ജോര്‍ജ് മെന്‍ഡസ് യുണൈറ്റഡ് അധികൃതരുമായി ചര്‍ച്ച നടത്തിയെന്നും വൈകാതെ റൊണാള്‍ഡോ യൂണൈറ്റഡിൽ മടങ്ങിയെത്തുമെന്നും വിദേശ മാധ്യമങ്ങൾ റിപ്പോര്‍ട്ട് ചെയ്തു. അതേസമയം, റൊണാള്‍ഡോ യുവന്റസ് താരങ്ങളോട് യാത്രപറഞ്ഞ് സ്വകാര്യ വിമാനത്തില്‍ ഇറ്റലി വിട്ടതായും റിപ്പോര്‍ട്ടുകളുണ്ട്.
✍️ എസ്.കെ.
Leave a reply