“ഒരേ ഒരു രാജാവ്” ഇത് ചരിത്രം; ഏഴാം തവണയും ബലോൻ ദ് ഓർ നേടി മെസ്സി.

വിശ്വ പ്രശസ്തമായ ബലോൻ ദ് ഓർ പുരസ്കാരം അർജന്റീന ഫുട്ബോൾ ഇതിഹാസം ലയണൽ മെസ്സിക്ക്. നിലവിൽ ഫ്രഞ്ച് ക്ലബ് പാരിസ് സെന്റ് ജർമന്റെ (പിഎസ്ജി) താരമായ മെസ്സിയുടെ 2020–21 വർഷത്തെ പ്രകടനത്തിന്റെ അടിസ്ഥാനത്തിലാണു പുരസ്കാരം. ഇക്കാലയളവിൽ അർജന്റീനയ്ക്കൊപ്പം കോപ്പ അമേരിക്ക കിരീടവും, സ്പാനിഷ് ക്ലബ്ബായ ബാഴ്സലോണക്കൊപ്പം കോപ്പ ഡെൽ റേ (കിങ്സ് കപ്പ്) കിരീടവും സ്വന്തമാക്കി. 38 ഗോളുകൾ നേടുകയും 14 എണ്ണത്തിനു വഴിയൊരുക്കുകയും ചെയ്തു. ഇന്നു പുലർച്ചെയായിരുന്നു പുരസ്കാര പ്രഖ്യാപനം. മുപ്പത്തിനാലുകാരൻ മെസ്സിയുടെ ഏഴാം ബലോൻ ദ് ഓർ നേട്ടമാണിത്. 5 തവണ ബലോൻ ദ് ഓർ നേടിയിട്ടുള്ള പോർച്ചുഗീസ് താരം ക്രിസ്റ്റ്യാനോ റൊണാൾഡോയാണ് ആകെ നേട്ടത്തിൽ മെസ്സിക്കു പിന്നിലുള്ളത്.

ജർമ്മൻ ക്ലബ് ബയൺ മ്യൂണിക്കിന്റെ താരമായ പോളണ്ട് സ്ട്രൈക്കർ റോബർട്ട് ലെവൻഡോവ്സ്കി, ഇംഗ്ലീഷ് ക്ലബ് ചെൽസിയുടെ ഇറ്റാലിയൻ താരം ജോർജിഞ്ഞോ എന്നിവരെ രണ്ടും, മൂന്നും സ്ഥാനത്തേക്ക് പിന്തള്ളിയാണ് മെസ്സി പുരസ്കാരം നേടിയത്. എന്നാൽ ഇത്തവണ ക്രിസ്റ്റ്യാനോ റൊണാൾഡോക്ക് ആറാം സ്ഥാനം കൊണ്ട് തൃപ്തിപ്പെടേണ്ടി വന്നു. നേരത്തേ 2009, 2010, 2011, 2012, 2015, 2019 വർഷങ്ങളിലാണ് മെസ്സി ബലോൻ ദ് ഓർ നേടിയിട്ടുള്ളത്.

◼️ മറ്റു പുരസ്കാരങ്ങൾ

▪️ മികച്ച യുവതാരം: പെദ്രി – സ്പെയിൻ (ബാഴ്‌സലോണ)
▪️ മികച്ച സ്ട്രൈക്കർ: ലെവൻഡോവ്സ്കി – പോളണ്ട് (ബയൺ മ്യൂണിക്)
▪️ മികച്ച വനിതാ താരം: അലക്സ്യ പ്യൂട്ടേയാസ് – സ്പെയിൻ (ബാഴ്‌സലോണ)
▪️ മികച്ച ഗോൾ കീപ്പർ: ജിയാൻല്യൂജി ഡൊന്നരുമ്മ – ഇറ്റലി (പിഎസ്ജി)

✍? എസ്.കെ.