ഇന്ത്യന്‍ സൂപ്പര്‍ ലീഗ് പ്ലേ ഓഫില്‍ കേരള ബ്ലാസ്റ്റേഴ്സിനെതിരെ ബംഗളൂരു താരം സുനില്‍ ഛേത്രി നേടിയ വിവാദ ഗോളിനു പിന്നാലെ സമൂഹമാധ്യമങ്ങളില്‍ താരത്തിനെതിരെ വ്യാപക വിമര്‍ശനം ഉയര്‍ന്നിരുന്നു. മത്സരത്തില്‍ അധിക സമയത്തിന്‍റെ 96ാം മിനിറ്റില്‍ ഫ്രീകിക്കില്‍ ഛേത്രി നേടിയ ഗോളിനെ ചൊല്ലിയായിരുന്നു തര്‍ക്കം. പിന്നാലെ ബ്ലാസ്റ്റേഴ്സ് താരങ്ങള്‍ മത്സരം ബഹിഷ്കരിച്ച്‌ മൈതാനം വിടുകയും ചെയ്തു.
ബ്ലാസ്റ്റേഴ്സ് താരങ്ങള്‍ പ്രതിരോധത്തിന് തയറാറെടുക്കുന്നതിനിടെ ഗോളി പ്രഭ്സുഖന്‍ സിങ് ഗില്‍ മുന്നോട്ടുകയറി നില്‍ക്കുന്നത് കണ്ട ചേത്രി ഞൊടിയിടയില്‍ പന്ത് വലയിലെത്തിക്കുകയായിരുന്നു. റഫറി ക്രിസ്റ്റല്‍ ജോണ്‍ ഗോള്‍ അനുവദിക്കുകയും ചെയ്തു. പിന്നാലെയാണ് പരിശീലകന്‍ ഇവാന്‍ വുകോമാനോവിച്ച്‌ ബ്ലാസ്റ്റേഴ്സ് താരങ്ങളെ തിരിച്ചുവിളിച്ചത്. മാച്ച്‌ കമീഷണര്‍ റഫറിയുമായി നടത്തിയ ചര്‍ച്ചക്കുശേഷം ബംഗളൂരുവിനെ വിജയിയായി പ്രഖ്യാപിക്കുകയായിരുന്നു. ബ്ലാസ്റ്റേഴ്സ് സെമി കാണാതെ പുറത്തേക്കും. താരത്തിന്‍റെ സമൂഹമാധ്യമ പോസ്റ്റുകള്‍ക്കു താഴെ ബ്ലാസ്റ്റേഴ്സ് ആരാധകരും ഫുട്ബാള്‍ പ്രേമികളും കടുത്ത ഭാഷയിലാണ് പ്രതിഷേധം രേഖപ്പെടുത്തിയത്. റഫറി അനുവദിച്ചിട്ടാണ് കിക്കെടുത്തതെന്നായിരുന്നു ഛേത്രിയുടെ വാദം. ഇന്ത്യന്‍ മുന്നേറ്റ താരത്തിന്‍റെ കോലം വരെ കത്തിക്കുന്ന തരത്തിലുള്ള വിഡിയോയും ഇതിനിടെ പുറത്തുവന്നു.
കൂടാതെ താരത്തിന്‍റെ ഭാര്യ സോനം ഭട്ടാചാര്യയും ആരാധക രോഷം അറിഞ്ഞു. അവരുടെ സമൂഹമാധ്യമങ്ങളിലും വിമര്‍ശന പോസ്റ്റുകള്‍ വ്യാപകമായി നിറഞ്ഞു. ഒടുവില്‍ ഇന്‍സ്റ്റഗ്രാമിലൂടെ ഇതിനോട് പ്രതികരിച്ചിരിക്കുകയാണ് അവര്‍. കുടുംബത്തെ അധിക്ഷേപിച്ചും ഭീഷണിപ്പെടുത്തിയും നിങ്ങള്‍ ആഗ്രഹിച്ചത് നേടിയെടുത്തെന്ന് കരുതുന്നതായി അവര്‍ കുറിച്ചു. “ഫുട്ബാള്‍, അഭിനിവേശം, പിന്തുണ എന്നിവക്കിടയില്‍ പരസ്പരം ദയ കാണിക്കാനും മാന്യമായി പെരുമാറാനും നമ്മള്‍ എങ്ങനെ മറന്നു? സമൂഹമാധ്യമങ്ങളില്‍ വെറുപ്പും വിദ്വേഷവും നിരാശയും എല്ലാം ഉപേക്ഷിച്ച്‌ നിങ്ങള്‍ വീട്ടില്‍ പ്രിയപ്പെട്ടവര്‍ക്കൊപ്പം സമാധാനത്തോടെ ഇരിക്കുകയാണെന്ന് പ്രതീക്ഷിക്കുന്നു. കുടുംബത്തെ അധിക്ഷേപിച്ചും ഭീഷണിപ്പെടുത്തിയും നിങ്ങള്‍ ആഗ്രഹിച്ചത് നേടിയെടുത്തെന്ന് ഞാന്‍ കരുതുന്നു. ഊഷ്മളതയും ആതിഥ്യമര്യാദയും അറിയുന്നവര്‍ വസിക്കുന്ന മനോഹര സംസ്ഥാനമാണ് കേരളം. അതിനാല്‍ വെറുപ്പ് നിറഞ്ഞ പരാമര്‍ശങ്ങളൊന്നും എന്റെ ധാരണ മാറ്റില്ല. ഫൈനല്‍ വിസില്‍ ഉയരുന്നതോടെ, ഫുട്ബാള്‍ കൊണ്ടുവരുന്ന എല്ലാ വികാരങ്ങള്‍ക്കും മുകളിലായി ദയയെ പ്രതിഷ്ഠിക്കുക” -സോനം ഇന്‍സ്റ്റഗ്രാമില്‍ കുറിച്ചു.
Leave a reply